သိပ္ပံနှင့်နည်းပညာဝန်ကြီးဌာန၊ သုတေသနနှင့်တီထွင်ဆန်းသစ်မှုဦးစီးဌာနမှ ကြီးမှူး၍ မဲခေါင်-လန်ချန်း ပူးပေါင်းဆောင်ရွက်ရေး အထူးရန်ပုံငွေ (၂၀၂၁) ဖြင့် အကောင်အထည်ဖော် ဆောင်ရွက်သည့် “လန်ချန်း-မဲခေါင်ဒေသရှိ စွန့်ဦးတီထွင်စီးပွားရေးဂေဟစနစ် ဖွံ့ဖြိုးမှုအတွက် နည်းပညာလွှဲပြောင်းမှု လျှင်မြန်‌စေရေး ဌာနတည်ဆောက်ခြင်းစီမံကိန်း” ၏ “မြန်မာနိုင်ငံတွင် မဲခေါင်-လန်ချန်းဒေသတွင်း နည်းပညာလွှဲပြောင်းပေးခြင်းဆိုင်ရာ စီမံခန့်ခွဲမှုစနစ်နှင့် MSMEs ဆန်းသစ်တီထွင်မှု ဖွံ့ဖြိုးရေး မူဝါဒများဖလှယ်ခြင်းတို့အတွက် အလုပ်ရုံဆွေးနွေးပွဲ” ဖွင့်ပွဲ အခမ်းအနားကို ၂၀၂၃ခုနှစ်၊ စက်တင်ဘာလ  (၆)ရက်နေ့၊ နံနက် (၉း၃၀) နာရီတွင်  ရန်ကုန်မြို့ရှိ Wyndham Hotel ၌ ကျင်းပဆောင်ရွက်ခဲ့ပါသည်။
အဆိုပါ ဖွင့်ပွဲအခမ်းအနားတွင် ရန်ကုန်တိုင်းဒေသကြီးအစိုးရအဖွဲ့၊ ဝန်ကြီးချုပ် ဦးစိုးသိန်း၊ မြန်မာနိုင်ငံဆိုင်ရာ တရုတ်ပြည်သူ့သမ္မတနိုင်ငံသံရုံး၏ အတိုင်ပင်ခံ ပုဂ္ဂိုလ် ဒေါက်တာ ကျန်းကျီဟွန်း၊ နိုင်ငံခြားရေးဝန်ကြီးဌာန၊ ဒေသခွဲဆိုင်ရာ ပူးပေါင်းဆောင်ရွက်မှုဌာန၊ ညွှန်ကြားရေးမှူး၊ ဒေါ်ခင်မိုးထူးတို့က အဖွင့်အမှာစကားများ ပြောကြားခဲ့ကြပါသည်။ ဖွင့်ပွဲအခမ်းအနားသို့ မြန်မာနိုင်ငံဆိုင်ရာ မဲခေါင်မြစ်ဝှမ်းနိုင်ငံများ၏ သံအမတ်ကြီးများ၊ ရန်ကုန်တိုင်းဒေသကြီး အစိုးရအဖွဲ့ဝင် ဝန်ကြီးများ၊ ဌာနဆိုင်ရာကိုယ်စားလှယ်များ၊ မဲခေါင်-လန်ချန်းနိုင်ငံများမှ ကိုယ်စားလှယ်များ၊ ဖိတ်ကြားထားသည့် ဧည့်သည်တော်များ တက်‌ရောက် ခဲ့ကြပါသည်။ 
မဲခေါင်-လန်ချန်းပူးပေါင်းဆောင်ရွက်မှုသည် မဲခေါင်နိုင်ငံအားလုံးအတွက် နယ်စပ် ဖြတ်ကျော် စီးပွားတိုးတက်စေရန်၊  ထုတ်လုပ်မှုစွမ်းရည်ပူးပေါင်းဆောင်ရွက်မှုများ အားကောင်း လာစေရန်၊ အငယ်စား၊ အသေးစားနှင့်အလတ်စား လုပ်ငန်းများ ဖွံ့ဖြိုးတိုးတက်လာစေရန်၊ တက်သစ်စလုပ်ငန်းငယ်များနှင့် စွန့်ဦးတီထွင်သူများအား စက်မှုလုပ်ငန်းယှဉ်ပြိုင်နိုင်စွမ်းနှင့် ကုန်ထုတ်စွမ်းအားကို အားကောင်းစေမည့် နည်းပညာအကူအညီများ ပံ့ပိုးပေးနိုင်ရန်ရည်ရွယ်၍ အလုပ်ရုံဆွေးနွေးပွဲအား ၂၀၂၃ခုနှစ်၊ စက်တင်ဘာလ  (၆)ရက်နေ့မှ (၇)ရက်နေ့အထိ၊ (၂)ရက်ကြာကျင်းပခဲ့ခြင်းဖြစ်ပါသည်။ 
အလုပ်ရုံဆွေးနွေးပွဲမှတဆင့် တရုတ်နှင့်မဲခေါင်‌ ဒေသတွင်းနိုင်ငံများတွင် လက်ရှိကျင့်သုံး လျက်ရှိသော နည်းပညာလွှဲပြောင်းမှု စီမံခန့်ခွဲမှု အလေ့အကျင့်ကောင်းများကို လေ့လာသင်ယူ ဖလှယ်နိုင်ခြင်း၊  အငယ်စား၊ အသေးစား ၊ အလတ်စားလုပ်ငန်းရှင်များသို့ နည်းပညာ လွှဲပြောင်းမှုနှင့် နည်းပညာအကူအညီများ အရှိန်တိုးမြှင့်ဆောင်ရွက်နိုင်ခြင်း၊ အစိုးရနှင့် စက်မှုကဏ္ဍချိတ်ဆက်မှုအားကောင်းလာစေနိုင်ပြီး ဒေသတွင်းပူးပေါင်း ဆောင်ရွက်မှုကိုလည်း ပိုမိုအားကောင်းလာစေနိုင်မည် ဖြစ်ပါသည်။