သုတေသနနှင့်တီထွင်ဆန်းသစ်မှုဦးစီးဌာန ၏ ၂၀၂၂-၂၀၂၃ ဘဏ္ဍာရေးနှစ်နှင့် ၂၀၂၃-၂၀၂၄ ဘဏ္ဍာရေးနှစ် များအတွင်း ထူးခြားတိုးတက်ပြောင်းလဲစေသော ဆောင်ရွက်မှုများနှင့်ပတ်သက်၍ ရှင်းလင်းတင်ပြခြင်း အစီအစဉ်ကို (၁.၁.၂၀၂၄) ရက်နေ့ နံနက်(၉း၃၀) မှ (၁၂း၀၀) နာရီအထိ သုတေသနနှင့် တီထွင်ဆန်းသစ်မှု ဦးစီးဌာန အစည်းအဝေးခန်းမတွင်  ကျင်းပဆောင်ရွက်ခဲ့ပါသည်။

အစီအစဉ်အရ ညွှန်ကြားရေးမှူးချုပ် ဒေါက်တာဖြူဖြူဝင်းမှ ရှေးဦးစွာ နှစ်သစ်ကြိုဆိုနှုတ်ဆက် စကား ပြောကြားပြီး နောက် ယခင်နှစ်များတွင် ဌာနများ၏ ဆောင်ရွက်မှုများကိုသာ တင်ပြခဲ့ပါကြောင်း၊ ယခုအကြိမ်မှာ ၂၀၂၂-၂၀၂၃ ဘဏ္ဍာရေးနှစ်နှင့် ၂၀၂၃-၂၀၂၄ ဘဏ္ဍာရေးနှစ်များအတွင်း ထူးခြားတိုးတက်ပြောင်းလဲစေသော ဆောင်ရွက်မှုများနှင့်ပတ်သက်၍ တင်ပြရန် စီစဉ်ခဲ့ပါကြောင်း၊ သုတေသနနှင့်တီထွင်ဆန်းသစ်မှုဦးစီးဌာန အနေဖြင့်  ၂၀၂၂-၂၀၂၃ ဘဏ္ဍာရေးနှစ်တွင် ဌာနဆိုင်ရာ လေ့လာဆန်းစစ်မှုအစီရင်ခံစာ (Departmental Monitoring Report-DMR) ရေးဆွဲပြုစုရာတွင် ဦးစီးဌာန၏ မဟာဗျူဟာမြောက် အပြောင်းအလဲများနှင့် ဆီလျော်မှုရှိ/မရှိ၊ မျှော်မှန်းရလာဒ်များနှင့် အကောင်အထည်ဖော်ဆောင်ရွက်သည့်လုပ်ငန်းများ၏ ရလာဒ်များနှင့် ထိရောက်မှုရှိ/မရှိ၊ ခွင့်ပြု ဘဏ္ဍာငွေ ကို အကျိုးရှိစွာ စီမံခန့်ခွဲနိုင်မှုနှင့် စွမ်းဆောင်နိုင်မှုရှိ/မရှိ၊  နိုင်ငံအတွင်း အမျိုးသားအဆင့် ၊ တိုင်းဒေသကြီး/ပြည်နယ်များတွင် ဆောင်ရွက်မှုများနှင့် အကျုံးဝင်ရှိ/မရှိ ကို သိရှိနိုင်ရန် လိုအပ်လာပါကြောင်း၊  သုတေသနနှင့်တီထွင်ဆန်းသစ်မှုဦးစီးဌာန လက်အောက်ရှိ ဌာနများ၏ ၂၀၂၂-၂၀၂၃ ဘဏ္ဍာရေးနှစ်အတွင်း ဆောင်ရွက်မှုများမှ  လုပ်ငန်း၏ တိုးတက်ပြောင်းလဲမှုအား လေ့လာဆန်းစစ်သည့်လုပ်ငန်း ကို ဆောင်ရွက်နိုင်ရန်  ထူးခြားတိုးတက်ပြောင်းလဲစေသော ဆောင်ရွက်မှုများနှင့် ပတ်သက်၍ သိရှိနိုင်ရန်အတွက် ယနေ့အခမ်းအနားအစီအစဉ်ကို ဆောင်ရွက်ခြင်းဖြစ်ပါကြောင်း ပြောကြားခဲ့ပါသည်။

ဆက်လက်၍  ဦးစီးဌာနအောက်ရှိ အမျိုးသား ဓာတ်ခွဲခန်း မှ ဒုတိယညွှန်ကြားရေးမှူးချုပ် ဒေါက်တာ ထွန်းထွန်းမိုး၊  သတင်းအချက်အလက်နှင့် ဆက်သွယ်ရေးနည်းပညာသုတေသနဌာနမှ ဒုတိယ ညွှန်ကြားရေးမှူးချုပ် ဒေါက်တာတင်တင်သိန်း ၊ ပြန်ပြည့်မြဲစွမ်းအင်နှင့် အီလက်ထရောနစ် သုတေသန ဗဟိုဌာနမှ ညွှန်ကြားရေးမှူး ဒေါက်တာလှမျိုးအောင်၊ အမျိုးသားစံချိန်စံညွှန်းနှင့် အရည်အသွေး ဌာနမှ ညွှန်ကြားရေးမှူး ဒေါက်တာကျော်စိုးလွင်၊ဓာတုနည်းပညာသုတေသနဗဟိုဌာနမှ ဒုတိယညွှန်ကြားရေးမှူး ဒေါက်တာကေသွယ်ခိုင်၊  တို့မှ  ၂၀၂၂-၂၀၂၃ ဘဏ္ဍာရေးနှစ်နှင့် ၂၀၂၃-၂၀၂၄ ဘဏ္ဍာရေး နှစ်များအတွင်း ထူးခြားတိုးတက်ပြောင်းလဲစေသော ဆောင်ရွက်မှုများနှင့်ပတ်သက်၍ power point presentation များဖြင့်  ရှင်းလင်းတင်ပြခဲ့ကြပါသည်။   ဦးစီးဌာန(ရုံးချုပ်) အနေဖြင့် ၂၀၂၂-၂၀၂၃ ဘဏ္ဍာရေးနှစ်နှင့် ၂၀၂၃-၂၀၂၄ ဘဏ္ဍာရေးနှစ်များအတွင်း ရုံးတွင်းစိမ်းလန်းစိုပြေရေးနှင့် သန့်ရှင်းသာယာရေး ဆောင်ရွက်ထားမှု အခြေအနေ များကို  ညွှန်ကြားရေးမှူး၊ ဒေါက်တာကျော်မိုးအောင် မှ power point presentation များဖြင့်  ရှင်းလင်းတင်ပြခဲ့ပါသည်။

ရှင်းလင်းတင်ပြချက်များအပေါ် တက်ရောက်လာသူများမှ သိလိုသည့်အချက်များကို မေးမြန်းဆွေးနွေးခဲ့ ကြပါသည်။ ဆက်လက်၍ ညွှန်ကြားရေးမှူးချုပ်၊ ဒေါက်တာဖြူဖြူဝင်း၊ ဒုတိယညွှန်ကြားရေးမှူးချုပ် ဒေါက်တာဇော်မင်းနိုင် တို့မှ ဌာနအသီးသီး၏ တင်ပြချက်များနှင့်ပတ်သက်၍ လိုအပ်သည်များကို လမ်းညွှန်မှုများ ပြုလုပ်ဆွေးနွေး ခဲ့ကြပါသည်။

ဆက်လက်၍ ညွှန်ကြားရေးမှူးချုပ် ဒေါက်တာ ဖြူဖြူဝင်း မှ နိဂုံးချုပ်အမှာစကား ပြောကြားရာတွင် ဦးစီးဌာနအောက်ရှိ ဌာနများမှ လုပ်ငန်းများကို အောင်မြင်စွာ ဆောင်ရွက်နိုင်ခြင်းမှာ ဌာနရှိ ဌာနမှူးအသီးသီး၏ ဦးဆောင်မှုအောက်တွင် ဌာနရှိ ဝန်ထမ်းများအားလုံး ညီညီညွတ်ညွတ်နှင့် ဆောင်ရွက်နိုင်ခြင်းဖြစ်သည့်အတွက် ကျေးဇူးတင်ရှိပါကြောင်းနှင့် ဌာနအသီးသီးရှိ ဝန်ထမ်းများအား တစ်ဆင့် ပြောကြားပေးကြပါရန် နှင့် နှစ်သစ်တွင် ပျော်ရွှင်ပါစေကြောင်း ဆုမွန်ကောင်းတောင်းပါကြောင်း ပြောကြားပြီး အခမ်းအနားကို နေ့လည် (၁၂း၀၀) တွင် ရုပ်သိမ်းခဲ့ပါသည်။

ညွှန်ကြားရေးမှူးချုပ် ဒေါက်တာဖြူဖြူဝင်းမှ ၂၀၂၂-၂၀၂၃ ဘဏ္ဍာရေးနှစ်နှင့် ၂၀၂၃-၂၀၂၄ ဘဏ္ဍာရေး နှစ်များအတွင်း ထူးခြားတိုးတက်ပြောင်းလဲစေသော ဆောင်ရွက်မှုများနှင့်ပတ်သက်၍ ရှင်းလင်းတင်ပြခြင်း အစီအစဉ်တွင် အဖွင့်အမှာစကားပြောကြားနေပုံ

အခမ်းအနားသို့ တက်ရောက်ကြသော  ဒုတိယညွှန်ကြားရေးမှူးချုပ်များ၊ ညွှန်ကြားရေးမှူးများ နှင့် ဒုတိယညွှန်ကြားရေးမှူးများ တက်ရောက်ပုံ

အမျိုးသားဓာတ်ခွဲခန်းမှ ဒုတိယညွှန်ကြားရေးမှူးချုပ် ဒေါက်တာထွန်းထွန်းမိုးမှ တင်ပြစဉ်

သတင်းအချက်အလက်နှင့်ဆက်သွယ်ရေးနည်းပညာသုတေသန ဌာနမှ ဒုတိယ ညွှန်ကြားရေးမှူးချုပ် ဒေါက်တာ တင်တင်သိန်းမှ တင်ပြစဉ်

ပြန်ပြည့်မြဲစွမ်းအင်နှင့် အီလက်ထရောနစ် သုတေသန ဗဟိုဌာနမှ ညွှန်ကြားရေးမှူး ဒေါက်တာလှမျိုးအောင် မှ တင်ပြစဉ်

အမျိုးသားစံချိန်စံညွှန်းနှင့် အရည်အသွေး ဌာနမှ ညွှန်ကြားရေးမှူး ဒေါက်တာကျော်စိုးလွင်မှ ရှင်းလင်းတင်ပြစဉ်

ဓာတုနည်းပညာသုတေသနဗဟိုဌာန မှ ဒုတိယ ညွှန်ကြားရေးမှူး ဒေါက်တာကေသွယ်ခိုင်ရှင်းလင်းတင်ပြစဉ်

ဦးစီးဌာန (ရုံးချုပ်) မှ ညွှန်ကြားရေးမှူး ဒေါက်တာ ကျော်မိုးအောင် မှ တင်ပြစဉ်

                   တင်ပြချက်များအပေါ် သိလိုသည်များအား မေးမြန်းစဉ်

                  တင်ပြချက်များအပေါ် သိလိုသည်များအား မေးမြန်းစဉ်

ညွှန်ကြားရေးမှူးချုပ်၊ ဒုတိယညွှန်ကြားရေးမှူးချုပ်များ၊ ညွှန်ကြားရေးမှူးများ၊ ဒုတိယညွှန်ကြားရေးမှူးများ နှင့် အမှတ်တရ စုပေါင်းဓာတ်ပုံ